Pido markado kay Chambers

MANILA, Philippines — May markang naiwan kay Far Eastern University head coach Sean Chambers noong naglalaro ito bilang import ng Alaska Aces sa PBA noong dekada 90.

Isa na rito ang pagkakataong makaharap sa matinding bakbakan si University of Santo Tomas head coach Pido Jarencio noon na dating player ng Ginebra.

At kung muli nitong makakaharap si Jarencio sa isang exhibition game ng mga UAAP coaches, game si Chambers na muling makipagsabayan.

“If Pido can put on a UST jersey and I can wear FEU, I will foul him hard for the times that he fouled me back in the Ginebra days,” ani Chambers.

Hindi itinatanggi ni Chambers na masama pa rin ang loob nito kay Jarencio dahil sa pamimisikal nito noong PBA days.

“I owe him most definitely. So maybe we’ll have a coaches league one day. But I’m still mad at Pid, yes. He knows it too,” biro ni Chambers.

May anim na titulo si Chambers kasama ang Alaska sa PBA.

Itinanghal itong Best Import noong 1996 Go­vernors’ Cup.

Sa ngayon, nakasentro muna ang atensiyon nina Chambers at Jarencio sa kani-kanyang teams sa UAAP Season 87 men’s basketball tournament.