Ang lihim ng  boyfriend

Dear Dr. Love,

Napakabait ng aking boyfriend at maalalahanin pa. Wala na akong maipipintas sa kanya kaya ko siya sinagot. Maglilimang buwan na ang aming relasyon.

Tawagin mo na lang akong Lily, 20 anyos. Guwapo at pusturyoso ang boyfriend ko at dahil sa kanyang tikas at kisig, marami ang naiinggit sa akin.

Pero isang araw, pinuntahan ako sa bahay ng uncle ko na isang NBI secret agent.

May ibinunyag siya na labis kong ikinagulat. Kasama raw ang boyfriend ko sa mga taong under surveillance dahil pinaghihinalaang drug trader. Sabi ni uncle na ninong ko rin sa binyag, makabubuti kung makikipag-break ako sa boyfriend ko.

Ipinakita sniya a akin ang picture ng boyfriend ko nang minsan na siyang maaresto sa kasong droga pero may namagitan daw na taong maimpluwensya kaya lumaya.

Naguguluhan ang isip ko. Tuwing kasama ko siya, ayaw ko siyang usisain at baka totoo ang sinabi ng aking uncle. Natatakot ako dahil mahal ko siya. Isang buwan na ngayon simula nang malaman ko ito pero hindi ako makapagsalita.

Kapag tinatanong ako ng boyfriend ko kung may problema ako, sinasabi ko na lang na masakit ang ulo ko. Ano ang dapat kong gawin?

Lily

Dear Lily,

Makabubuti kung susundin mo ang uncle mo na makipag-break ka sa iyong boyfriend. Hindi mo kailangang sabihin ang dahilan kung bakit. Isang awtoridad ang iyong uncle at hindi ka naman niya marahil lolokohin o pagsisinu-ngalingan.

At tama lang na wala kang sasabihin sa iyong nalaman dahil baka manganib pa ang iyong buhay.

Kung kabaitan ang ipinakikita ng boyfriend mo sa iyo, natural lamang iyan dahil may pinagtatakpan siya sa kanyang pagkatao.

Kung nakakadama ka ng pag-ibig, iwaksi mo muna iyan at unahin mo ang iyong seguridad.

Baka dumating ang punto na pati ikaw ay madamay.

Dr. Love