Takot nang umibig

Dearest Dr. Love,

Hi and Hello. This is my first time to write you at umaasa akong pagbibigyan mong ma­ilat­hala ang aking problema sa buhay.

Tawagin mo na lamang akong Cris, still a bachelor at age 35.  Iisa pa lang ang naging girlfriend ko dahil masyado akong naging abala sa trabaho at sa pagtataguyod ng aking mga kapatid  (3 silang lahat) na pinag-aaral ko.

Malungkot ang problema ko sa pag-ibig. Ma­tapos ang dalawang taong relasyon namin ng girlfriend ko, nakipagtanan siya sa ibang lalaki.

Hindi na ako naghintay ng paliwanag pero ang pangyayaring yaon ay naging dahilan para ako maging woman hater.

Tatlong taon na sapul nang mangyari yaon hanggang sa may makilala akong nagpatibok muli ng puso ko. Pero ayaw ko nang manligaw pa. Natatakot ako na baka sapitin kong muli ang naging mapait kong karanasan.

Tama bang supilin ko ang aking damdamin?

Cris

Dear Cris,

May kasabihan na mas mabuting umibig at mabigo kaysa hindi umibig. Totoo iyan. Ang isang masaklap na karanasan ay hindi dapat maging dahilan para mawala ang tiwala mo sa lahat ng babae.

Dahil lang ba sa maling ginawa ng iyong naunang kasintahan ay titigil na ang mundo mo sa pag-ikot? Huwag kang matakot umibig at pagbigyan mo ang nadarama ng iyong puso.

Dr. Love