Mga biyahero ‘stress’ na sa eTravel app sa airport - Poe

MANILA, Philippines — Iginiit ni Sen. Grace Poe na dapat padaliin ang paggamit ng eTravel System para sa mga pasaherong darating at aalis ng Pilipinas.

“Complaints have been raised about how many passengers were stressed out by this ­tedious and time consu­ming requirement,” ani Poe.

Ipinunto ni Poe na bagaman at mabuti ang hangarin ng eTravel System, hindi naman ito dapat magdulot ng abala sa mga pasahero.

Sinabi rin ni Poe na kapwa nagrereklamo ang mga  internet-savvy at technologically-challenged sa pag-access sa app dahil sa rami ng detalye na hinihingi upang makumpleto ang proseso.

Kabilang aniya sa ba­ngungot ng mga pasahero ay ang isyu ng availability ng internet sa mga airports at ang mga pawala-walang koneksiyon.

Idinagdag ni Poe na maaaring magtulungan ang  Bureau of Immigration at Department of Information and Communications Technology para gawing mas mahusay at madali ang digital data collection platform.

Sinabi rin ni Poe na dapat magkaroon ng isang eTravel System na ligtas, madaling gamitin at mas mabilis para sa mga bisita na papasok at aalis ng bansa.