Teves naka-house arrest sa Timor Leste

MANILA, Philippines — Dahil itinuturing umanong “flight risk,” inilagay sa house arrest ng korte sa Dili, Timor Leste si dating Negros Oriental Rep. Arnolfo “Arnie” Teves Jr. habang dinidinig ang kaniyang extradition case.

“We learned from Timor Leste Prosecutor General that former Cong. Teves is now on house arrest,” pahayag ni DOJ Undersecretary Raul Vasquez.

Bagaman naka-house arrest, sinabi ni Vasquez na “inalisan” pa rin ng korte ng kalayaan si Teves at bantay-sarado ng mga pulis.

Batay sa mga impormasyon na inilabas ng Timor-Leste media agency na Hatutan.com, inihayag ng Court of Appeals (CA) na dumating sa kanilang bansa si Teves sakay ng private plane noong Abril 2023.

Nakatira umano ang pinatalsik na kongresista sa isang bahay na may buwanang upa na $10,000 (mahigit kalahating milyong piso) kasama ang kaniyang asawa at mga anak.

Mayroon din umanong 20 tauhan si Teves na kinabibilangan ng 10 Pinoy at 10 Timorese.

“Given the facts above, it is concluded that the risk of flight persists for the extraditee, especially since he has the financial means to leave Timor-Leste,” saad ng CA.

“I order... the arrested individual below named is to be taken to House Arrest at his residence to await further extradition proceedings,” dagdag pa sa desisyon.

Kinumpirma naman ni Atty. Ferdinand Topacio, abogado ni Teves, ang house arrest sa kaniyang kliyente. Pero itinanggi niya na dahil ito sa pagiging flight risk ng dating kongresista.

“After having determined that he is not a flight risk and that he has not violated any laws, he was placed under guard in his residence simply to ensure his attendance in the hearings,” ani Topacio.

Ayon sa DOJ, nagpapatuloy ang pagdinig para sa extradition ni Teves para tuluyan na siyang makauwi sa bansa at mapanagutan ang mga kinakaharap na kaso.

Si Teves ay pinatalsik sa Kamara noong Agosto 2023 dahil sa patuloy na hindi pagdalo sa kaniyang mga tungkulin matapos ang alegasyong siya ang naging utak sa pagpaslang kay dating Negros Oriental Gov. Roel Degamo na ikinasawi rin ng 5 iba pa noong Marso 2023.