MANILA, Philippines — Pirmado na ni Pangulong Rodrigo Duterte ang dalawang batas na magpapalawig sa validity ng 2020 national budget at Bayanihan to Recover as One Act o Bayanihan 2.
Sa ilalim ng Republic Act No. 11519 na nilagdaan ni Duterte noong Disyembre 29, ang pondo para sa Bayanihan 2 ay maaaring ilabas at magamit hanggang Hunyo, 30, 2021.
Samantala sa ilalim ng RA 11520, papalawigin ang 2020 General Appropriations Act hanggang Dis. 31, 2021.
Kahapon inilabas ng Malacanang ang kopya ng dalawang bagong batas.
Nasa P148 bilyon pondo pa sa ilalim ng Bayanihan 2 at ng 2020 national budget ang hindi pa nagagamit.
Ang 2020 national budget dapat hanggang Disyembre 31, 2020 na lamang samantalang ang Bayanihan 2 ay nagtapos noong Disyembre 19, 2020.
Ang dalawang bagong batas ay sinertipikahang urgent ni Duterte.