MANILA, Philippines — Dalawang bata ang nasawi dahil sa dehydration habang nasa 42 iba pa ang nagtatae at nagsusuka sa Bongo Island na bahagi ng Parang, Maguindanao.
Sa ulat mula kay BARMM Health Minister Saffrulah Dipatuan, na bukod sa COVID-19 ay mahigpit din nilang tinututukan ang diarrhea ourbreak sa lugar.
Sinabi ni Dipatuan na nagpadala na sila ng health workers para imbestigahan ang insidente at agad na gamutin ang mga apektadong residente.
Hinala ng health official, posibleng kontaminadong tubig ang dahilan ng pagtatae ng mga residente sa lugar.
Nabatid na wala ring mga palikuran ang mga residente sa lugar kaya posibleng dahilan din ito ng kanilang pagkakasakit.
Gayunman, nilinaw ni Dipatuan na wala namang indikasyon ng cholera batay sa pagsusuri sa bakterya mula sa water sample.