MANILA, Philippines — Tinukoy na ng Philippine National Police (PNP) ang 18 lugar sa bansa bilang mga election hotspots kaugnay ng midterm elections sa Mayo 2019.
Sa report ng PNP, kabilang dito ang Sudipen at Balaoan na pawang sa La Union sa Region 1; Jones, Isabela sa Region II; Lemery, Batangas sa Region IV A Southern Tagalog; Roxas, Oriental Mindoro sa Region IV B; Balud at Dimasalang na pawang sa Masbate sa Bicol Region; Pagadian City, Zamboanga del Sur sa Region IX; Cagayan de Oro City, Misamis Oriental sa Northern Mindanao.
Samantala lumilitaw naman na pinakamaraming hot spots sa Autonomous Region in Muslim Mindanao (ARMM) na kinabibilangan ng Marawi City at Sultan Dumalondong sa Lanao del Sur; Hadji Mohammad Ajul, Lantawan at Tipo-Tipo na pawang sa lalawigan ng Basilan; Mamasapano, Shariff Saydona Mustapha, Shariff Aguak at Datu Unsay sa Maguindanao.
Alinsunod sa kategorya ang isang lugar ay election hotspots kung matindi ang labanan sa pulitika sa pagitan ng mga kandidato at kung may presensya ng mga armadong grupo na banta sa pambansang seguridad gayundin ang mga Private Armed Groups (PAGS) at gun for hire ng mga mandarayang pulitiko.
Ang nasabing mga lugar ay may mga naitala ng pagdanak ng dugo na iniuugnay sa matinding labanan sa pulitika.
Sa kasalukuyan patuloy naman ang maigting na pagpapatupad ng seguridad ng pinagsanib na puwersa ng PNP at AFP upang matiyak na magiging mapayapa ang pagdaraos ng halalan sa susunod na taon.