25 OFWs sa Qatar binigyan ng clemency

MANILA, Philippines — Inihayag ni Labor Secretary Silvestre Bello III na pinagkalooban ng royal pardon ng Emir of Qatar ang 25 manggagawang Filipino na nakulong dahil sa iba’t ibang pagkakasala sa katatapos na buwan ng Ramadan.

Ayon kay Bello, ang 25 overseas Filipino workers (OFWs) ay uuwi na sa bansa sa lalong madaling panahon.

Nabatid na ang mga nakulong na OFWs  ay may kaso ng talbog na tseke, bawal na droga at pakikiapid o adultery at ilang buwan na silang nakadetine.

Kaugnay nito, ipinabatid ng kalihim sa Emir ng Qatar Sheikh Tamim Bin Hammad Al Thani ang pasasalamat ni Pangulong Rodrigo Duterte sa kanyang iginawad na awa sa 25 OFWs.

Patunay aniya ito ng matibay na relasyon ng dalawang bansa.

Si Bello ay dumalo sa selebrasyon ng Philippine Independence Day na natapat sa pagdiriwang ng Ed’l Fitr  inorganisa ng Philippine embassy sa Doha kung saan dumalo ang 4,000 Filipino migrant workers na sinaksihan din nina Qatar minister of Administrative Development, Labor and Social Affairs, Dr. Essa Bin Saad Al Jafali Al Nuaimi at iba pang Qatari officials.