MANILA, Philippines – Inamin ni Justice Secretary Leila de Lima na patuloy ang drug operation sa New Bilibid Prison sa kabila ng sunud-sunod nang pagsalakay dito.
Ayon kay de Lima, bigo silang masawata ang droga sa NBP kahit na ilang ulit ng ni-raid ito matapos na makadiskubre ng ilang mga black books o notebooks na listahan ng mga drug transactions mula sa ilang mga inmates.
Aniya, sa nakita nilang drug transaction, indikasyon lamang ito na may nagmamaniobra pa rin ng pailalim subalit hindi naman sila umano titigil hangga’t hindi nauubos ang mga ito.
“Kanina lang, may nakita uling log books at notebooks ng drug transactions. Ongoing talaga ang operations after major raid nong December 15. What I can confirm to you is that they represent drug transactions,” ani de Lima.
Bagama’t may tukoy na silang tao, sinabi ni de Lima na mas kailangan ang malalim na intelligence network upang mabunyag ang nag-o-operate nito sa ngayon.