MANILA, Philippines – Hinikayat ni Ako Bicol partylist Rep. Rodel Batocabe ang Korte Suprema na mag-isyu ng special writ of national heritage laban sa developer ng Army Navy Club (ANC) upang mapreserba ang nasabing historical site at hindi ma-convert sa casino.
Ayon kay Batocabe, senior member ng House Committee on Tourism, kailangang protektahan ang mga cultural landmark sa bansa mula sa umano’y mga unscrupulous developer.
Tiwala naman ang kongresista na agad kikilos ang Korte Suprema sa pamamagitan ng pag-iisyu ng Writ of Kalikasan.
Ang pahayag ni Batocabe ay base sa ulat na ang ANC ay magiging isang pasugalan na dahilan kaya gumawa ng legal na hakbang ang National Historical Commission of the Philippines (NHCP) laban sa developer na sisira rito.
Nanindigan naman si Kabataan Partylist Rep. Terry Ridon na manatili ang Cease and Desist Order laban sa Oceanville maliban na lamang kung mangangako ito na muling ibabalik sa orihinal na istraktura ang ANC.