MANILA, Philippines - Isang 29-anyos na Pinay ang nasawi sa kasagsagan ng ipinatutupad ng pamahalaan na sapilitang paglilikas sa mga OFWs sa Syria.
Kinumpirma ng Department of Foreign Affairs (DFA) mula sa report ng Honorary Consul sa Aleppo ang pagkamatay ng nasabing Pinay na nagtatrabaho sa siyudad ng Alleppo noong Setyembre 7.
Ayon kay Foreign Affairs Spokesman Raul Hernandez, walang kinalaman sa nagaganap na bakbakan sa Syria ang pagkasawi ng Pinay na hindi pa pinangalanan at sa isinagawang pagsisiyasat ng pulisya at Syrian Coroner’s Office ay natural death ang naging sanhi nito at walang senyales ng foul play.
Nabatid na habang nasa trabaho, bigla na lamang umanong nag-collapse o bumagsak ang Pinay at nagawa pang maisugod sa pagamutan subalit hindi na siya umabot pang buhay.
Inaasikaso na ng Embahada ng Pilipinas ang repatriation sa mga labi ng nasabing OFW habang nakikipag-ugnayan na sila sa kaanak nito upang ipabatid ang kanyang sinapit sa Syria.