Paghahanap ng langis ng Taiwan sa WPS, inalmahan

MANILA, Philippines - Habang kasagsagan ng tensyon sa pagitan ng Pilipinas at China dahil sa pinag-aagawang teritoryo sa West Philippine Sea (WPS), nagpahayag na ang Taiwan, isa sa mga bansang umaangkin sa nasabing teritor­yo, na plano na nilang simulan ang eksplorasyon upang maghanap ng la­ngis sa Kalayaan Islands Group o Spratly islands ngayong 2013.

Dahil dito, agad na umalma ang Department of Foreign Affairs (DFA) at sinabing ang Pilipinas lamang ang may sovereign right na “mag-explore at mag-exploit” ng anumang uri ng resources at yamang dagat nito na nasa loob ng exclusive economic zone (EEZ) sa West Philippine Sea o South China Sea.

Iginiit ni Foreign Affairs spokesman Raul Hernandez na ang Pilipinas lamang ang maaaring mag-explore sa bahagi ng Spratly islands na nasasakop sa 200-nautical miles continental shelf ng bansa.

Ang pahayag ng DFA ay kasunod sa pag-anunsyo ng Taiwan na sisimulan na ng kanilang Bureau of Mines at state-run supplier na CPC Corporation ang paghaha­nap ng langis o gas sa Ligao island na isa sa pinag-aagawang isla sa Spratlys.

Pinangangambahan na magdudulot ng panibagong tensyon ang planong kick off exploration ngayong 2013 ng Taiwan sa WPS bukod pa sa ba­ngayan sa China.

Bukod sa China at Taiwan, kabilang din sa mga claimants sa Spratlys ang Vietnam, Brunei at Malay­sia.