Takas sa Talisay gisaulog, simple nga selebrasyon gipahigayon

CEBU, Philippines — Gisaulog sa Dakbayan sa Talisay ang ika-80 ka tuig nga Takas sa Talisay o American Landing kagahapon.

Gisugdan ang kalihukan pinaagi sa Santos nga Misa dayon nisunod ang pag ampo sa pari nga hapon nga si Takeshi Ishida uban sa pipila ka mga hapon.

Gihimo ang wreath laying ug ang flower offering alang sa pagpasidungog sa mga beterano nga padayon nga nagpakabuhi ingon man ang tanang katawhan nga nibuhis sa ilang kinabuhi ma amerkano, hapon ug mga pinoy man panahon sa ikaduhang gubat sa kalibutan.

Nagkalain-laing bisita gikan sa America ug Japan ang nitambong ingon man ang mga opisyal sa siyudad, Consul General Hideaki Matsuo of Japan, Consul General Glenn Ivan Loop sa USA, President sa Japanese Association of Cebu Raiku Fujioka, Veterans of Foreign Wars, Philippine Navy ug uban pa.

Si Talisay City mayor Gerald Anthony “Samsam” Gullas nagkanayon dili angay kalimtan ang nahitabo ug angay kini nga himoong panag-ingnan aron dili makasinati sa mga kasaypanan.

Matud pa sa mayor nga gihimo nila nga simple apan mabulokon nga kalihukan aron ipasabot sa kabataan ang mga niaging katuigan.

Dugang pa niini nga angayan mahibalo ang Talisaynon ilabi na ang bag-ong henerasyon sa atong ka swerte tungod sa mga sakripisyo nga gihimo sa mga beterano 80 ka tuig ang nakalabay.

Si Mikki Aznar, ang Tourism Officer sa dakbayan nitug-an nga sukad tuig 2022 gi-focus nila ang kahiusahan sa tulo ka nasud.

Si Aznar, nitug-an nga gisultihan usab sila sa historian hinungdan ilaha usab nga gikorhian nga atol sa pag-abot sa mga amerkano nakalalin na usab ang mga hapon ngadto sa Barangay Lahug sa Dakbayan sa Sugbo diin sila nanago.

Samtang pipila nalang sa pamilya sa mga katigulangan nga veterans ang nitambong sa maong kalihukan. (BANAT NEWS)