Kanhi empleyado gustong humanon ang CCMC

CEBU, Philippines — Usa ka 58-anyos nga kanhi corporate marketing employee niduso og certificate of candidacy alang sa pagpapili pagka-mayor sa Dakbayan sa Sugbo , tinguha niyang humanon ang dugay na kaayong walay kahumanang konstruksyon sa Cebu City Medical Center aron makaalagad kini sa katawhan sa siyudad.

Ang nidagan mao si Julieto Co nga taga Barangay Guadalupe, giduso niya ang COC kagahapon, Oktubre 4, 2024 sa buhatan sa Commission on Elections.

Si Co independeteng kandidato, milatag sa iyang upat ka mga plataporma sa kun diin lakip na niini  ang pagdoble sa hinabang pinansyal alang sa mga senior citizen matag buwan.

“Sa pagkakaron, P1000 ang cash assistance matag buwan, kung itugot, himoon natong P2000. Ang pangutana, kaya ba? Kaya! Kay dato kaayo ang syudad sa Sugbo,” deklarasyon pa ni Co.

Matud pa ni Co nga ang P1000 nga tabang pinansyal sa mga senior citizen wala gyud kini mapausbaw sukad nga gisugdan kini sa administrasyon ni kanhi mayor Tomas Osmeña.

Saysay pa niya nga usa ka lider nga nagmahal ug nagpangga sa syudad ang gikinahanglan karon sa dakbayan.

Gusto sab niyang humanon na ang pagpatukod sa CCMC kay sobra usa ka dekada na ang milabay human kini gisugdan apan tulo ka andana pa lang ang napuslan sa katawhan.

Pangitaan sab ni Co og kasulbaran kining problema sa baha pinaagi sa pagpakgang sa kurapsyon sa mga opisyales sa gobyerno.

Matud  niya ang kurapsyon maoy tinubdan maong hangtud karon daghan pang mga dalan ug kanal ang wala natrabaho tungod kay ang pundo alang niini napaingon sa laing butang. (BANAT NEWS)