5.1 magnitude nga linog mitay-og sa Sugbo

CEBU, Philippines — Gitay-og 5.1 magnitude nga linog ang  Central Visayas kagahapong adlawa, Septiyembre 29. Ang maong linog miigo alas 2:53 sa hapon nga dunay gilawmong miabot sa 11 kilometro ilawom sa kadagatan lungsod sa Poro sa isla sa Camotes, lalawigan sa Sugbo.

Ang maong pagtay-og nabatyagan pud sa pipila ka bahin sa Visayas. Sumala sa Philippine Institute of Volcanology and Seismology (PHIVOLCS-DOST) nga intensity 4 nasinati sa Poro ug sa siyudad sa Talisay, Cebu;  Candijay, Duero, Inabanga, President Carlos P. Garcia, San Miguel, Sierra Bullones, ug Talibon, sa Probinsya sa Bohol; Baybay City, Hilongos, Hindang, ug Matalom sa Leyte.

Ang Intensity 3 natala sa lungsod sa San Fernando, sa lalawigan sa Sugbo; lungsod sa Garcia Hernandez sa Bohol ; Albuera, Merida, ug Palompon, Leyte; Ormoc ug Sogod, Southern Leyte.

Ang lungsod  sa Argao; lungsod  Isabel, Javier, ug Villaba, sa Leyte; ug ang lungsod sa Hinunangan ug Hinundayan sa Southern Leyte maoy nakatala og intensity 2 samtang intensity 1 sa Carigara, Dulag, ug Matag-ob sa lalawigan sa Leyte.

Human sa alas 2:53 sa hapon nga linog, laing 2.2 magnitude nga linog na pud ang nahitabo kon diin sa lungsod sa Poro, Camotes Island gihapon ang lokasyon.

Didto sa lungsod sa Poro nga duol sa sentro sa linog, walay natala nga kadaot o naangol human sa pagtay-og, sumala sa Municipal Disaster Risk Reduction and Management Office base sa inisyal nga assessment niini pipila ka oras human sa linog. Sa pagsulat niining balita, walay natala nga kadaot sa mga lungsod kon asa nasinati ang pagtay-og say uta kagahapong adlawa. — /IBM (BANAT NEWS)