50 ka polis sa Mandaue gi–drug test

CEBU, Philippines - Ang kadagkoan sa Mandaue City Police Office (MCPO) nagpahigayon og kinalit nga drug test ngadto sa 50 ka polis aron pagsuta kun kinsa kanila ang nalambigit sa paggamit og illegal nga drugas.

Si Superintendent Crisaleo Tolentino, deputy director for operation sa MCPO, miingon nga ang mga sakop sa City Intelligence Branch, City Anti-Illegal Drugs Special Operation Task Group, administration personnel ug ang mga police station chief maoy gipaubos og surprise drug test.

Matud ni Tolentino nga si MCPO director Petroneli Baldebrin nakahukom sa pagpasiugda og kinalit nga drug test sa ilang mga polis sa pagsuta kun kinsa kanila ang mga adik.

Ang kagamhanan sa Mandaue maoy mipadala og medical personnel gikan sa City Health department nga maoy mihimo sa drug test.

Ang maayo nga balita mao nga wala’y bisan usa sa 50 ka polis nga gihimoan og random drug test nga napositibo sa gidili nga matang sa ilegal nga drugas.

Sa laing bahin, kadtong mga sakop sa Provincial Intelligence Branch (PIB) sa Cebu Provincial Police Office (CPPO) nga gihimoan usab og kinalit nga drug test kaniadtong Miyerkules pulos usab negatibo sa paggamit og shabu.  (BANAT NEWS)

Show comments