Turista sa Lapu-Lapu pabantayan g’yud — Mayor Radaza

CEBU, Philippines - Gimandoan ni Lapu-Lapu City Mayor Paz Radaza ang bag-ong hepe sa kapolisan sa dakbayan nga ialerto ang mga tourist police sa tanang hotel ug beach resort panahon sa summer o bakasyon.

Matud ni Radaza nga nagsugod na og pangabot ang mga langyaw ug lokal nga turista sa isla sa Mactan og dili siya buot nga mabiktima sa dautang elemento ang mga bisita.

Giawhag ni Radaza si Senior Superintendent Armando Radoc nga kinahanglang ipreserbar ang kamalinawon sa Lapu-Lapu.

Lakip ang Isla sa Olango pabantayan ni Mayor Radaza kay usa kini sa mga duawon sa mga turista sama sa fish sanctuary sa Barangay Talima ug bird sanctuary sa Barangay Sta. Rosa nga hugpaan usab sa mga turista.

Matud sa mayor nga kinahanglan’g bantayan kanunay ang mga bisita ug himoan dayon og aksiyon kun adunay mga reklamo’ng madawat.

Si Radaza miingon nga kinahanglan nga mabatyag sa mga langyaw nga luwas sila sa ilang pagbisita sa Sugbo.

Si Radoc miingon nga adunay tulo ka tourist police sub-stations nga ipahimutang nga dali ra maduolan sa mga turista ug anaa kini mahimutang sa Barangay Punta Engano, Maribago ug Marigondon.

Gawas sa mga sub-stations, adunay roving patrol ug uniformed police sa mata’g hotel ug beach resort nga gihugpaan sa mga turista. (BANAT NEWS)