P12M reward money ang gigahin vs wanted persons

CEBU, Philippines - Mokabat sa P12 milyones ang reward money nga nahatag na ug padung pa ihatag sa gobiyerno ngadto sa mga tawo nga nakatudlo sa mga tawo nga wanted hinungdan sa pagkasikop kanila.

Ang Criminal Investigation and Detection Group 7 mibutyag nga 18 ka mga tawo ang ilang nasikop sa miaging tuig.

Ang hepe sa CIDG 7 nga si Sr. Supt. Ritchie Posadas misugo sa iyang mga tawo nga hingusgan ang pagsikop sa mga wanted persons sa rehiyon.

Sa Enero niining tuiga nakasikop ang CIDG og pito ka mga wanted ang kinadaghan kini sulod lamang sa usa ka bulan.

Sa 18 ka mga tawo nga nangasikop walo niini ang may patong sa ulo, upat ang walay reward ug unom ang nasikop nga nakabuhat og linoog nga krimen.

Sumala ni Supt. Fermin Armendares, Deputy Director for Operation sa CIDG nga lakip na sa 18 ang magtiayong Benito ug Wilma Tiamzon nga may patong nga P5.6 milyones matag usa kanila, apan ang reward wa pa mahatag.

Nasikop ang maong magtiayon niadtong Sabado sa mga sakop sa CIDG national office, CIDG7, Armed Forces of the Philippines Intelligence Unit ug sa Carcar City Police Station sa bukirang bahin sa barangay Zaragosa sa lungsod sa Aloguinsan.

Ang duha nag-atubang og 15 counts of murder ug gi-isyuhan og warrant of arrest ni Executive Judge Ephrem Abando sa RTC Branch 18 sa Hilongos, Leyte.  (BANAT NEWS)