CEBU, Philippines - Subling nagkaengkwentro ang militar ug mga gidudahang miyembro sa Bansamoro Islamic Freedom Fighters diha sa Nalapaan North Cotabato niadtong Sabado.
Gibanabanang moabot dos mil ka mga pamilyang mag-uuma ang mibiya sa ilang mga panimalay aron makalikay sa kagubot. Matud pa nga dunay mga pagbuto nga milanog sa palibot sa maong lungsod nga gituohang gikan sa mga mortar apan wala pa matino kung kang kinsang habig kini nagikan.
Ang mga residente mihiklin una sa ilang mga paryente o sa mga evacuation centers diha sa lungsod sa Pikit.
Matud pa ni Gov. Emmylou Mendoza, Biyernes pa lang sa gabii dihang nagsugod ang engkwentro tali sa mga sakop sa BIFF ug sa militar.
Gikompirmar kini sa tigpamaba sa lokal nga militar nga nalambigit sa maong engkwentro nga si Colonel Dickson Hermoso apan gawas sa pag-ingong operasyon kadto batok sa mga bandido wala na kini mohatag pa og dugang impormasyon.
Matud pang Mendoza ang sentro sa engkwentro nahitabo sa lungsod sa Aleosan kansang mga molupyo gidominar sa mga Muslim sa maong bahin sa Mindanao. Ang kasundalohan miprotektar sa highway sumala pa ni Mendoza tungod kay peligro sa probinsya kung kini mapailawom sa kontrol sa mga rebelde. Ang BIFF maoy gitumbok nga utok sa pagpamomba sa Cagayan de Oro sa miaging semana nga mikalas og katorse ka kinabuhi ug kapin sa setenta ang naangol. Ang maong grupo dakong supak sa Bangsamoro Framework Agreement tali sa gobiyerno ug sa Moro Islamic Liberation Front. (BANAT NEWS)