“Mother Ship” balangay nadiskubrehan

CEBU, Philippines - Usa ka gituohang kinadak-ang balangay o kadtong karaang sakyanan sa dagat sa mga karaang Filipino ang nadiskubrehan ning bag-ohay lang sa Butuan City, gituohang ang pagkadiskubre niini makapausab sa kasaysayan sa panakayan (maritime) sa Pilipinas.

Sumala pa sa report sa GMA News.Tv, ang maong balangay gibanabanang 800 anyos na, ug gituohang mas nauna pa sa mga barkong galeyon sa mga Espanyol nga nangabot dinhi sa Pilipinas niadtong ika- 16 nga siglo

Matud pa ni National Museum archeologist Dr. Mary Jane Louise A. Bolunia, ang mga researchers mibutyag nga ang tanang mga butang nga makita sa maong balangay pulos mga dagko, gani ang mga kahoy nga lansang susama kadagko sa lata sa softdrinks.

Tungod sa gidak-on sa maong mga lansang, nakaingon ang mga researchers nga dako gyud kaayo ang maong balangay. “So with "nails" that size, exactly how big is this boat?”

Niadtong 1970’s dunay balangay nga nadiskubrehan nga may gitas-ong kinse ka metros apan ang nadiskubrehan ning bag-ohay lang masigo ang duha ka susamang balangay sa lawas niini.  Matud pa nga gibanabanang may gitas-ong 25 metros ang maong dako nga balangay nga nadiskubrehan ug wala pa kini makompleto og kaugkat.

 Sa pagkakaron gitun-an pa og maayo sa mga historians ug mga siyentipiko kung unsa nga klase sa kahoy ug kung kanus-a gyud kini gibuhat. Apan gihulagway kini base sa gidak-on nga maoy “mother boat” sa mga balangay nga una nang nadiskubrehan niadtong 1970s. (BANAT NEWS)