Inflation rate sa nasud mikunhod

CEBU, Philippines - Ang pagkunhod sa presyo sa pagkaon ug ubang palaliton nakab-ot sa bulan sa Hulyo karong tuiga, sumala pa sa National Economic & Development Authority (NEDA).

Usa kini ka timailhan nga nagmalampuson ang gobyerno pagkab-ot sa 3.0 hangtud 5.0 porsiyento nga inflation rate karong tuiga.

Subay sa taho sa National Statistics Office (NSO) nga ang inflation rate nga natala sa bulan sa Hulyo 2013 mikunhod og 2.5 porsyento kung itandi sa miaging tuig.

Matud pa ni Socioeconomic Planning Secretary Arsenio Balisacan ang narehistro  nga inflation rate sa bulan sa Hulyo 2013 maoy labing  mubo   sa miagi nga upat ka tuig.

Ang inflation rate mao ang porsyento sa pagtaas sa presyo sa mga palaliton ug serbisyo,  nga base sa kwentada sa Consumer Price Index (CPI).

Ang padayon nga paglig-on sa presyo sa mga palaliton nagpaila nga nagmalampuson ang gobyerno paghatag og kasulbaran sa kahimtang sa kagutom ug kakabos aron makab-ot ang gipangandoy nga kauswagan  sa nasud  matud pa ni  Balicasan. (BANAT NEWS)