Kapitolyo mobayad na sa Dakay Construction

CEBU, Philippines - Human sa napulo ka tuig, ang Dakay Construction and Development Corporation mabayran na sa tanan sa ilang pagtukod sa Legislative Building sa Kapitolyo.

Ang hunta probinsiyal milig-on na sa kantidad nga P1.3 milyones nga bayronon ngadto sa DCDC.

Pinaagi sa resolusyon ni Bokal Peter John Calderon, gitugutan si Gob. Hilario Davide III sa paggamit sa development fund ning tuiga diin kuhaon ang maong kantidad.

Ang lalawigan sa Sugbo nigahin og P63 milyones sa pagpatukod sa Legislative and Engineering Building niadtong 2003.

Matud pa ni Calderon nga dugay rang nahurot ang maong pundo.

Gitukod ang maong edipisyo niadtong Enero 6, 2003 ug nahuman niadtong Agosto 22, 2004. Ang kalig-on sa maong edipisyo nahimong isyu sa dihang ang 4.2-magnitude nga linog miigo sa Sugbo niadtong 2007.

Gisaway usab ni anhing bise gobernador Gregorio Sanchez Jr. ang DCDC sa giingong wala  moatiman sa mga depekto niini.

Usa sa gireklamo mao  ang mga liki sa bongbong samtang nangatagak pa ang ubang bahin sa kisame niini.

Usa ka Amado Gochoco sa dakbayan sa Mandaue ang nipadangat usab og reklamo sa buhatan sa Ombudsman-Visayas labot sa maong proyekto. (BANAT NEWS)