Lola nga nanginhas milutaw sa dagat patay na

CEBU, Philippines - Patay nang napalgan ang usa ka lola nga naglutaw sa dagat sa Brgy. Ibo dakbayan sa Lapulapu sa milabay’ng adlaw. Matod pa ni Victor Polonio usa ka mananagat sa Brgy. Ibo maoy nakasindol sa patay’ng lawas sa dalagang-ulay nga si Genara Acedilla, 60, residente sa Brgy. Mactan.

Nasuta sa kapolisan nga adunay 12 ka mga tudlo ang maong patay’ng lawas ug posibleng wala pay 24 oras kining nalumos ug ang igsuon niining si Taciana Abarca maoy miila sa patay’ng lawas sa iyang igsoon.

Walay foul play nga nakita sa kapolisan sa patay’ng lawas sa biktima. Matud pa ni Abarca walay gihambing  sakit ang iyang igsoon apan mahilig kini nga manginhas daplin sa baybayon.

Sa milabay’ng Lunes milakaw si Acedilla kay manginhas apan wala na kini mahibalik sa ilang panimalay hinungdan nga ila kining gipangita hangtod ngadto sa dakbayan sa Talisay. (Bong Soriano/EIM)

Turista, amigo gitulis samtang nagpaabot og bus

Dul-an sa 100 mil ka pesos nga kantidad sa kabtangan ug cash ang nadala gikan sa usa ka bayot ug langyaw human sila gitulis sa armadong tawo diha sa sitio Lapnis, barangay Kalubihan sa lungsod sa Barili pasado alas-2 sa miaging hapon.

Ang mga biktima nailhan nga silang Jose Tatoy Castillo,25 ug Patryk Klaudiusz Malek, 19, usa ka Polish national nga nagpuyo na sa Lincoln, Lincolnshire, England ug kasamtangan silang nagpuyo sa barangay Mabolo dakbayan sa Sugbo.

Sa pasiunang imbestigasyon sa kapolisan sa lungsod sa Barili, gikatahong ang duha adunay giduaw sa maong lungsod ug nianang mga alas-2 sa hapon mamauli na unta sa dakbayan sa Sugbo.

Apan samtang sila nagpaabot sa waiting shed og bus de pasaheroan  gihunongan sila og duha ka lalaking nagmotorsiklo ug ang mga sakay mition kanila og armas dayong deklarar og tulis.

Tungod sa ilang kahadlok ang duha daling mihatag sa ilang mga kabtangan  sama sa Apple Ipad4 nga nagbalor og 40 mil; usa ka relo nga Emporio Armani nga mobalor og P32 mil; usa ka Samsung cellphone nga mobalor og 6 mil pesos; cash nga P2 mil ug mga identification cards.

Matud pa nga milahos dayon ang mga tulisan og ikyas apan tungod kay wa pa gihapon sila makasakay og bus naagian sila og balik sa mga tulisan nga namalik sa agi.

Dunay pagduda ang kapolisan nga mga taga diha ra sa maong dapit ang mga suspek. (BANAT NEWS)