MANILA, Philippines – Matibay ang ebidensyang hawak ng National Bureau of Investigation laban sa umano’y mastermind sa pork barrel scam na si Janet Lim-Napoles at mga kasabwat niyang mambabatas.
"Nagiging maingat lang kami na when we file the cases nandiyan 'yung mga ebidensya ... Galing sa whistleblowers ang pangalan ng lawmakers na ito," pahayag ni Justice secretary Leila De Lima ngayong Huwebes.
Pero hindi naman masiguro ni De Lima kung isisiwalat ba ni Napoles ang lahat ng kanyang nalalaman.
"Maswerte tayo kung isawalat ni Napoles ang lahat ng ng alam niya pero sino ba ang nakakasiguro sa'tin ngayon na 'yan ang plano n'ya?" dagdag ng Justice secretary.
Siniguro naman ni De Lima na mananagot ang mga nasa likod ng pangungurakot pero aniya’y bahagyang maaantala ang paglabas ng resulta ng kanilang imbestigasyon.
"It should be within the week. Now, magkakaroon po ng kaunting Delay dahil ang medyo tedious is 'yung pag-o-organisa ng supporting [pieces of] documentary eviDence," banggit ni De Lima.
"Gusto namin masiguro na when we file, presentable at airtight so to speak ang isang kaso," dagdag niya.
Naunang sinabi ni De Lima na naapektuhan ang kanilang imbestigasyon sa pagbibitiw ng pinuno ng NBI na si Nonnatus Rojas matapos kastiguhin ni Pangulong Benigno Aquino III ang ahensya.
Nakahandang isampa ang kasong plunder sa Ombudsman laban sa mga lilitaw na pangalan sa imbestigasyon.