Dingdong mas inuna ang NYC kesa sa baby shower ni Baby Marian

Sa Saturday, September 26 na ang baby shower ni Baby Maria ng tinaguriang Royal Couple na sina Dingdong Dantes at Marian Rivera. Nag-post si Dra. Vicki Belo ng invitation para sa royal princess pero siyempre, hindi mababasa kung saan at kung anong oras ang baby shower. Dito na ia-announce kung ano ang buong pangalan ni Baby Maria. Kung dati ay sinabi ni Ma­rian na hahayaan niyang si Ding­dong ang mag-aannounce ng name ng baby nila, ngayon ay si Marian na rin ang maghahayag dahil wala at hindi makadadalo ang asawa.

Kailangan daw kasing mag-attend ng MOVE Award si Dingdong as Commissioner –At-Large ng National Youth Commission (NYC). Sayang at hindi namin matatanong si Dingdong kung marunong na siyang magpalit ng diaper ng baby. Magiging hands on daw kasi siya kay Marian sa pagtulong sa pag-aalaga ng magiging baby nila tulad nga ng pagpapalit ng diaper, hindi pa raw siya marunong pero mapag-aaralan daw naman niya iyon. Sa November na darating ang pinakahihintay nilang baby girl.

Paulo napabilib sa acting ni Jasmine

Kababalik lamang ni Paulo Avelino from the ASAP show in London, pero back to work agad siya dahil bukod sa shooting niya ng musical movie na Larawan, showing na starting today ang horror movie na Resureksyon ng Regal at Reality Entertainment, Inc. Kagabi raw sa premiere night ay tinakot talaga nito ang mga manonood. Gumaganap siyang si Javier, a town cop na nag-iimbestiga ng strange killings na gawa raw ng isang vampire.  Katambal niya sina Isabelle Daza at Jasmine Curtis Smith.

Masaya raw katrabaho si Isabelle dahil iisa ang manager nila at hindi naman iyon ang first time niyang nakatrabaho si Jasmine na una niyang nakasama sa Transit at humanga siya sa young actress dahil nanalo agad ito ng acting award.

Humanga rin si Paulo sa director nilang si Borgy Torre dahil alam nito kung paano niya tatakutin ang audience.

Showing na today in cinemas nationwide ang Resureksyon.

Yaya Dub nakakapagsalita na talaga!

Wala si Maine Mendoza aka Yaya Dub sa kal­yeserye kahapon, sabi ni Lola Nidora, okey naman kalagayan ng apo, kaya lamang pinagpapahinga muna.  Nag-request si Yaya ng fruits, na sabi naman nina Lola Tidora at Lola Tinidora na samahan na rin daw ni Alden Richards ng turon at cake. Lumabas ng studio si Alden at bumili ng mga fruits, turon, cake at sinamahan pa niya ng bulaklak sa kata­bing grocery Broadway studio. Nag-request si Alden kung pwedeng dalhin niya nang personal ang gifts niya kay Yaya pero tumanggi si Lola Nidora dahil ayaw daw ng doctor, kailangan daw talagang magpahinga muna si Yaya.  Bago natapos ang kalyeserye, nari­nig na naman ang pagtawag ng ‘lolaaa’ ‘lolaaa’ na sinundan ng ‘Alden’ ‘Alden.” Si Yaya Dub na nga ba ang tumatawag na iyon?