Kabaitan ni Liezl pinatunayan kahit ng mga hindi taga-showbiz

MANILA, Philippines - Pinasyalan namin si Marie Barvicui kamakailan sa kanyang bahay sa Balik-balic, Quezon City. Si Marie ay dakilang fan at kaibigan ni Vilma Santos. Childstar pa si Ate Vi ay kilala na niya ito. Dumating pa ‘yung time na pinatira siya sa bahay ni Vilma noong buhay pa ang mga magulang nito. Si Marie pa ang kasa-kasama ni Vilma nang ma-involve ito kay Romeo Vasquez. Dahil naging close si Marie kay Romeo, pati na rin ang anak nitong si Liezl Martinez ay naging close sa kanya.

In fact, ipinakita pa sa amin ni Marie ang cross-stitch wall clock na bigay sa kanya ni Liezl. Na-shock si Marie sa balitang patay na si Liezl. Talagang tumulo ang luha niya nang sabihin namin ang masamang balita. Nang hapong ‘yon, tumanggap siya ng tawag mula sa kampo ni Liezl na nagsasabing umattend siya ng lamay bago ito i-cremate.

Si Marie ay walang kasama sa bahay kahit 80 years old. Palagi siyang nagpupunta sa PNP Custodial Center para pasyalan sina Senator Bong Revilla at Jinggoy Estrada. “Sila ang tumutulong sa akin at malaki ang utang na loob ko sa kanila,” sabi niya.