Angel nalimutan si Phil dahil sa award

Hindi sukat akalain ni Angel Locsin na mananalo siya bilang Mo­vie Actress of the Year sa nakaraang  Star Awards for Movies kamakailan. Tinalo pa nito ang mga premyadong aktres na sina Gov. Vilma Santos for The Healing, Gina Alajar sa Mater Dolorosa, at Nora Aunor para sa Thy Womb. Ipinanalo naman ni Angel ang mahusay na performance sa One More Try.

Sa kabilang banda, nagkanda-buckle-buckle si Angel sa kanyang acceptance speech dahil hindi sukat akalain na mananalo at nakalimutan pang ialay din ang award sa boyfriend na si Phil Younghusband. Natutuwa naman sina Gina, Vilma, at Nora sa pagkapanalo ni Angel at sinabing deserving naman ito sa award na natanggap.

Alfred gagawa pa ng pelikula at TV show

Sa intimate presscon ni Konsehal Alfred Vargas ay sinabi nitong wala naman siyang hinanakit kahit hindi man lang nominado sa Movie Actor of the Year para sa pelikula niyang Ang Supremo sa nakaraang Star Awards for Movies. Excited na nga ang actor-politician dahil for competition sa Malaysia sa March 28 ang kanyang pelikula tungkol kay Andres Bonifacio.

Inamin nito na binigyan niya nang higit na priority ang pagiging public servant at ilang award na ang natanggap bilang Most Outstanding Councilor ng Quezon City.

Kaya naman kakandidato ito sa pagiging congressman sa 5th district ng Quezon City at advocacy na makatulong pa sa mga constituent lalo na pagda­ting sa trabaho, pabahay, livelihood at edukasyon. Tapos naman ito ng kolehiyo sa Ateneo de Manila University at may masters pa sa UP Diliman in public administration.

“Gagawa pa rin ako ng movie. Siguro isang pelikula sa isang taon. Gayun din ang TV show,” sabi ng Alfred.

Alden pinapantasya si Anne

Nakausap namin si Alden Richards sa presscon ng Mundo Mo’y Akin na palabas na sa Marso 18 ng GMA Telebabad at siyang papalit sa Pahiram ng Sandali. Naitanong kung sino ang mga artistang malakas ang dating para sa kanya. Ayon dito, gusto niya si Alessandra de Rossi dahil masarap kasama at kalog. Pero mas higit si Anne Curtis dahil super ganda at napaka-sexy para sa kanya ng aktres.

“Dalawang taon ko nang ’di siya nakikita ng personal. Gusto ko siyang ma-meet at makasama sa pelikula balang araw,” sabi ng aktor.

Sa Mundo Mo’y Akin ay gagampanan ni Alden ang karakter ni Jerome Alvarez at katambal si Louise delos Reyes bilang si Marilyn Mendoza.