Imago (80)

NAKALUHOD pa rin si Maya sa tabi ng walang malay na lalaki, habang ang kanyang dibdib ay halos sumabog sa sobrang kaba. Pilit niyang pinalipas ang panginginig ng kanyang mga daliri bago mabilis na kinapa ang mga bulsa ng kalaban.

Kinuha niya ang 9mm na baril at binuksan ang magazine niyon sa ilalim ng humihinang sinag ng flashlight.

Apat na bala na lamang ang natitira.

Kahit nakahawak na noon ng baril, ang mabigat at malamig na bakal sa kanyang palad ay pakiramdam na tila hindi niya makakasanayan, napakalayo sa pamilyar at matigas na timbang ng kanyang camera. Ngunit sa mundong kanyang kinasasadlakan ngayong gabi, ang apat na balang iyon ang maaaring maging hangganan sa pagitan ng kanyang buhay at kamatayan.

Bukod sa baril, nakuha rin niya mula sa jacket ng lalaki ang isang maliit na pocket flashlight, isang kaha ng posporo at isang nakatuping papel.

Ipinasok niya ang baril at posporo sa loob ng kanyang jacket. Dahan-dahan niyang inalis sa pagkakatupi ang papel sa sahig, isang lumang kopyang guhit-kamay ng mapa ng buong Drydock 4. May mga pulang marka sa paligid ng pambansang imbakan at ng lumang drainage pipe patungo sa dagat.

Isinilid ni Maya ang mapa sa bulsa habang ma­ingat na itinatali ang kanyang sapatos.

Tumingin siya sa pinto ng silid. Mayroon na siyang armas, ilaw, at mapa. Hindi na siya ang takot at walang alam na biktimang dinala rito sa likod ng pickup.

Sa dahan-dahang pag-ikot niya sa ha­wa­kan ng pinto gamit­ ang nakuhang keycard, handa na siyang lumabas sa dilim. (Itutuloy)