NAISAHAN ng isang may-ari ng tindahan sa Charleroi, Belgium ang limang kalalakihan na nanutok sa kanya ng baril at nagdeklara ng holdap sa kanyang establisimento.
Kita sa CCTV footage kung paano napigilan ng may-ari ang panghoholdap sa kanyang tindahan nito lamang nakaraang Sabado sa pamamagitan ng pagkumbinsi sa mga kawatan na bumalik na lang sa hapon kung kailan mas marami nang lamang salapi ang kanilang cash register.
Naniwala naman ang grupo sa sinabi ng may-ari kaya umalis ang mga ito nang hindi siya hinoholdap.
Halatang lubos din ang pagkakumbinsi ng may-ari sa mga holdaper dahil bumalik pa ang mga ito noong hapon ding iyon sa tindahan, kung saan may mga pulis nang nakaabang upang sila ay arestuhin.
Dahil sa nangyari ay naniniwala tuloy ang may-ari na hindi nag-iisip ang mga nangholdap sa kanyang tindahan.
Tiklo ang limang kalalakihan na nanloob sa tindahan, kabilang na ang isang menor de edad.