Magandang bulaklak ako’y nauuhaw bumukad ka sana
at ipaangkin mo ang nektar ng iyong bangong masanghaya
ang awit ng puso sa gitna ng dilim pakinggan mo sana
paos na ang tinig sa kinatataghoy sa pangungulila
Kaya nga bulaklak dumungaw ka sana sa iyong bintana
at doo’y malasin ang hapis na lagay ng aking dambana
ang lupang tuntungan sa aking pagtaghoy lunod sa luha
pigtal na sa dusa ang hibla ng aking wagas na adhika
O sintang bulaklak huwag kang maramot ako ay pakinggan
lunod na ang puso sa dibdib ng kanyang luksang bilangguan;
madali ka sana pag di mo inabot na ito’y may buhay
ikaw ang may salabulaklak ng aking mga panagimpan