Di pa nagtatagal ang ating Kongreso
biglang pinagtibay budget ng gobyerno;
pagkalaki-laki at nakahihilo
kung saan dadalhin malaking misteryo?
Akalain mo bang ang nasabing budget
ay maraming trilyon sa baya’y pamingwit;
para bang ang Pinoy waring iniinggit
sa dami ng perang nanggaling sa buwis!
Budget na malaki ay pera ng bayan
kaya bakit kaya ito’y naisipan
na kunin ang pera sa Kaban ng Bayan
gayong may savings daw ng taong nagdaan?
Ang tanong ng bayan sa ating Kongreso
ang malaking budget saan ba patungo?
Hindi kaya ito’y gusto ng gobyerno
upang sa pork barrel ay muling ipondo?