Maraming ulikba

Itong ating mundo’y maraming ulikba

sila ay nagkalat sa bahay na dampa;

dahil ugali nila ay lubhang masama

taong mababait ay winawalanghiya!

Kahit sa tahanang malaki’t konkreto

ang mga ulikba’y kasama ng tao;

ang mga mapera kunwari’y kasosyo

pero wala naman kahi’t na sentimo!

Sa mga okasyong maliit malaki

palaging mayabang at nagmamalaki;

sila’y laging bida’t tanging dili-dili

sila’y makauna sa gawaing mali!

Kaya kung sa inyo’y may taong lalapit

magpapakilalang siya’y kapanalig

ang ugali niya inyong isaisip

na baka lansi lang at gustong magsipsip!