Ang taong malas sa lottery games

MAY mga taong hindi pa nananalo kahit minsan lang sa lottery games o maski sa Christmas raffle ng kompanyang pinagtatrabahuhan. May nagsasabing may “balat” daw sa puwit ang taong hindi manalo-nalo sa anumang number games.

At isa sa mga taong ito si Cotis Mitsotakis ng Sodeto, Spain. Si Mitsotakis ay isang Greek pero matagal nang naninirahan sa Sodeto. Isa siyang film maker.

Nakatira sa isang malaking compound na binubuo ng 70 households si Mitsotakis. Masaya sila roon at lahat ay magkakakilala. Mayroon silang homeowners association.

Noong Christmas ng December 2012, nagkaroon ng lottery sa Sodeto at lahat nang mga nakatira sa compound ay bumili ng tiket, pati si Mitsotakis ay isa rin sa bumili. Umaasa siya na mananalo na at magiging masaya ang kanyang Christmas.

Subalit gaya nang dati, hindi na naman siya nanalo. Talagang malas siya sa lottery at anumang number games.

Naghihimutok si Mitsotakis sapagkat lahat ng mga tao sa compound na bumili ng tiket ay nanalo, maliban sa kanya.

Pinaghati-hatian ng mga tao sa compound ang $950 million na premyo.