Rep. Leviste, ipinaaaresto ng Makati RTC

MANILA, Philippines — Ipinaaaresto ng Makati City Regional Trial Court Branch 235 si Batangas 1st District Rep. Leandro Leviste dahil sa umano’y paglabag sa Public Services Act.

Batay sa warrant of arrest na may lagda ni Presiding Judge Ricardo Molez II na may petsang Oktubre 5, 2026, inaatasan ang mga alagad ng batas na arestuhin si Leandro Antonio Leviste kaugnay sa kasong paglabag sa Public Service Act, Section 25 ng Commonwealth Act No. 146, na inamyendahan ng Republic Act 11659, at iharap sa korte. May itinakdang piyansa na P72,000.00 ang korte sa nasabing kaso.

Napadalhan na ng kopya ang Philippine National Police-Directorate for Investigation and Detective Management (PNP-DIDM), National Bureau of Investigation (NBI).

Sinabi ni NBI Director Melvin Matibag na hanggang sa kasalukuyan ay nasa abroad pa si Leviste kaya makikipag-ugnayan sila sa Bureau of Immigration para matukoy ang immigration status ng mambabatas at ang kinaroroonan niyang bansa at wala pang impormasyon kung kailan ito uuwi ng bansa.

Makikipag-ugnayan din aniya, ang NBI sa Department of Foreign Affairs (DFA) sa posibleng mga hakbang kabilang ang pagkansela sa passport,

Noong Setyembre 25 nang sabihin ng spokesperson ni Senator Loren Legarda, na si Atty. Tony La Viña na nasa France si Leviste na umaalalay sa senadora sa pagpapagamot.

Matatandaang noong nakaraang Mayo nang maghain ng reklamo Department of Energy (DOE) sa Department of Justice (DOJ) laban kay Leviste at sa 5 opisyal ng Solar Para sa Bayan Corporation (SPBC) sa diumano’y paglabag sa Public Service Act, kaugnay sa kabiguan na magtayo at magbigay ng electric power sa mga kustomer sa “remote, unviable, unserved, or underserved areas as provided under the company’s 2019 franchise, which Congress granted under Republic Act No. 11357.”

Tinukoy si Leviste sa reklamo bilang chairman, president, chief executive officer, at director.