Unang araw ng filing ng COC generally peaceful - PNP

MANILA, Philippines — Generally peaceful ang unang araw ng filing ng Certificate of Candidacy kahapon sa iba’t ibang lugar sa bansa.

Ito ang inihayag ni Philippine National Police (PNP) chief Gen. Rommel Francisco Marbil na patuloy ang kanilang monitoring sa sitwasyon sa filing ng COC at umaasa na magtutuluy-tuloy ito hanggang sa Oktubre 8.

Nabatid na nasa mahigit 36,000 pulis ang idineploy sa buong bansa upang matiyak na maayos at ligtas ang filing ng COC.

Dagdag pa ni Marbil, pinaalalahanan din niya ang mga pulis na siguraduhin na non partisan ang PNP upang maiwasan ang anumang isyu.

Kasabay nito, sinabi ni Marbil na pinaghahandaan din nila ang pagsisimula ng Election Period sa Enero ng susunod na taon.

Kasama sa pinatutukan niya ang paglansag at paghabol sa mga private armed group, criminal gangs at loose firearms na maaaring magamit sa karahasan.