MANILA, Philippines — Namatay noon din ang isang 27-anyos na ginang matapos sakalin ng ka-live in partner sa loob ng kanilang inuupahang bahay sa Malate, Maynila, kamakalawa ng gabi.
Kinilala ang biktima na si Flordeliza Talaro, tubong Davao de Oro, dating oversease Filipino worker (OFW), residente ng Brgy. 704, Gumamela St., Malate, Maynila. Habang naaresto ang suspek na si Jhunrey Bastasa, 33-anyos, construction worker, tubong Davao del Norte.
Sa ulat ng Manila Police District-Homicide Section, bago nangyari ang krimen, alas-8:40 ng gabi ay nag-iinuman ang dalawa sa kanilang inuupahang bahay nang magkaroon ng mainitang pagtatalo dahil sa nagseselos umano ang suspek na ang biktima ay laging may kausap na lalaki sa cellphone.
Nang sitahin ng suspek ang biktima ay nagkaroon sila ng mainitang pagtatalo hanggang sa kumuha ng nylon cord at sinakal ang huli hanggang sa ito ay kanyang mapatay.
Tumakas ang suspek at makaraan ang tatlong oras ay sumuko ito sa Manila Disaster Risk Reduction and Management Office (MDRRMO).
Nabatid na ang dalawa ay may anak na 8 at 9-anyos at dati nang naghiwalay, subalit muling nagkabalikan. Inihahanda na ang kasong murder na isasampa laban sa suspek na nakapiit sa MPD-Homicide Section.