MANILA, Philippines — Namatay agad ang isang babaeng naka-motorsiklo nang mabagok ang ulo sa pagtilapon nang bumangga sa gutter at poste sa Buendia Flyover, Makati City, kamakalawa.
Idineklarang patay ni Dr. Dememar Jill Payot ng Makati Search and Rescue Ambulance, ang biktimang si alyas Rochelle, 24, empleyado at residente ng Pembo, Taguig City.
Sa ulat ng Vehicular Traffic Investigation Unit ng Makati Traffic Bureau, alas-5:30 ng umaga ng Hunyo 30, nang mangyari ang self-accident sa pakurbang bahagi ng EDSA Buendia-Kalayaan Flyover eastbound lane, bahagi ng Brgy. Pinagkaisahan, Makati.
Nabatid na galing sa Sen. Gil Puyat Avenue patungo sa Bonifacio Global City (BGC) ang biktima na nagmamaneho ng Yamaha Areox.
Nang gumilid umano ito sa kaliwang bahagi ng eastbound lane ay nawalan na ng control at nasadsad sa sementadong gutter na lalo pang nawalan ng control at binangga pa ang bakal na street light.
Dahil sa impact ay tumilapon sa kalye ang biktima, nabagok at tumama ang ulo sa sementadong kalye, at tumalsik din ng ilang metro ang suot na helmet.