Dalagang angkas sa motor, dedo sa bangga
MANILA, Philippines — Nabasag ang bungo at namatay ang isang 17-anyos na babae na angkas sa motorsiklo nang bumangga ang kanilang sinasakyan na minamaneho ng kanyang nobyo, kamakalawa ng umaga sa Brgy. Malino Ilaya, Atimonan, Quezon.
Kinilala ang nasawing biktima na si Alyssa Tagub, ng Brgy. Zone III habang patuloy na nilalapatan ng lunas sa Dona Martha District Hospital dahil sa tinamong mga sugat sa iba’t ibang parte ng katawan ang nobyo nitong si alyas Joselito, may sapat na taong gulang at residente ng Brgy. Tinandog.
Ayon sa pulisya, alas-6:00 ng umaga ay sakay ang mga biktima sa isang Honda motorcycle at binabagtas ang old zigzag road, subalit pagsapit sa kurbada ay nawalan ng kontrol sa manibela si Joselito at tuluy-tuloy na binangga ang railings na nasa gilid ng highway.
Dahil kapwa mga walang suot na helmet ay nagtamo ng mga grabeng pinsala ang nasawing biktima at nobyo.
- Latest
