MANILA, Philippines — Apat na pulis-Laguna ang kinasuhan ng kidnapping sa piskalya dahil umano sa pagdukot at pagnanakaw sa dalawang drug suspects sa Brgy. Parian, Calamba City, noong Enero 11, 2024.
Kinilala ang mga kinasuhan sa piskalya na sina Captain Nat; Staff Sergeant Mal; Corporal Cas; Patrolman Satur na pawang mga nakatalaga sa Calamba police station at 4 john does.
Ayon kay National Police Commission (Napolcom)-Calabarzon director, Atty. Owen De Luna na bukod sa kasong criminal ay nahaharap din ang apat na pulis sa kasong administratibo dahil sa misconduct o malfeasance and conduct unbecoming of a police officer batay sa Napolcom memorandum circular No. 2016-002, rule 21, section 2C.
Nabatid na ang mga inakusahang mga pulis ay positibong kinilala ng mga nagrereklamo sa isang police line-up o identification process sa Calamba City Police Station noong April 12 at Police Regional Office 4A headquarters sa Camp Vicente Lim, Calamba City noong Mayo 6, 2024.
Nabatid na ang dalawang nagsampa ng reklamo ay sangkot sa droga na dinukot ng walong armadong kalalakihan at ang apat na nasabing pulis ay kasama doon.