Paslit nalunod sa swimming pool

MANILA, Philippines — Napalitan ng kalungkutan ang masaya sanang paliligo ng isang pamilya sa isang private resort matapos malunod ang isang 4-anyos na batang lalaki, kamakalawa sa Rodriguez, Rizal.

Kinilala lamang ang biktima sa pangalang ‘Roxan,’ 4, residente ng Sitio Sapa Wawa, Brgy.  San Rafael, sa Rodriguez.

Sa ulat ng Rodriguez Municipal Police Station, alas-3:00 ng hapon nang maganap ang insidente ngunit naiulat lamang ito sa pulisya kamakalawa.

Nauna rito, dahil sa init ng panahon ay nagkayayaan ang pamilya ng biktima na maligo sa isang pribadong resort na matatagpuan sa Sitio Wawa 2, sa Brgy. San Rafael.

Maya-maya ay nagulat na lang umano ang ina ng biktima nang makitang walang malay ang anak habang nakababad sa tubig.

Kaagad umano nilang isinugod ang biktima sa Casimiro Ynares Hospital ngunit idineklara na itong patay ng mga doktor.