ACT-Agri Kaagapay kasama ni PBBM sa pagbigay ng financial aid sa Mindoro

MANILA, Philippines — Kasama ang ACT-Agri Kaagapay Organization ng Pangulong Ferdinand Marcos Jr. sa pamamahagi ng financial assistance at iba pang serbisyo sa mga magsasaka at ma­ngingisda na apektado ng El Ninophenomenon sa San Jose, Occidental Mindoro.

Ang Pangulo, kasama sina Occidental Mindoro Gov. Eduardo Gadiano, San Jose Mayor Rey Ladaga at ACT Agri-Kaagapay president Virginia Ledesma Rodriguez ay nagtungo sa Bgy. San Jose kung saan mahigit sa 1,500 benepisyaryo ang nabigyan ng financial aid, habang ang mga magsasaka ay nabiyayaan rin ng fuel subsidy.

Bukod sa pamamahagi ng ayuda sa mga magsasaka at mangi­ngisda, nangako rin ang punong ehekutibo ng tulong sa lokal na pamahalaan upang makahanap ng solusyon sa krisis sa kuryente, gayundin ang problema ng mga magsasaka.

Sa nasabing aktibidad, personal namang binigyan ni Rodriguez, ng iniakda niyang librong “Leave Nobody Hungry”, si Pang. Marcos na malugod itong tinanggap.

Nagpasalamat din ang pangulo kay Rodriguez sa kanyang kontribusyon sa pagkakaloob ng kaala­man at awareness sa mga magsasaka hinggil sa paggamit ng organic fertilizers at modern farming equipment para mapataas ang ani ng mga magsasaka sa bansa. Ang ACT Agri-Kaagapay organization ay non-government non-profit agency na nagkakaloob ng financial aid para sa mga indibidwal na kabilang sa mahihirap, margina­lized, vulnerable, at disadvantaged sector.

Inatasan din naman ng pangulo ang National Irrigation Administration (NIA) na maglagay ng irrigation systems para sakupin ang ilang munisipalidad sa Occidental, Mindoro, partikular na ang mga bayan ng San Jose at Magsaysay upang palakasin ang agricultural production.