MANILA, Philippines — Dinakip ng mga otoridad ang isang ginang matapos masamsam sa kanya ang milyong halaga ng shabu nang kunin niya ang isang kahon mula sa Philippine Post Office sa Pasay City.
Ang suspek ay kinilalang si Catherine Amatiaga, isang housekeeper.
Batay sa ulat, habang bitbit ni Amatiaga ang isang kahon na kinuha niya sa Central Mail Exchange Center (CMEC) sa Pasay City ay pinigilan siya ng mga tauhan ng PDEA-NAIA-Inter Agency Drug Interdiction Task Group dahil sa pagdududa na ang laman ng isang metal container na idineklara bilang universal engine.
Nang buksan ay tumambad ang apat na pouch na naglalaman ng hinihinalang shabu na may bigat na 514 gramo na nagkakahalaga ng P3.49 milyon.
Ayon sa Bureau of Customs, nanggaling pa sa New Delhi, India ang nakumpiskang droga na ipinadala ng isang Dewajani Pal ng Dwarka Sector 7, Rampal Chowk Palam Extension, Badlapur, South West Delhi at naka-consign sa isang Ashley Carao Alonzo, ng Krus na Ligas, Quezon City.
Inamin ni Amatiaga na binayaran lamang siya para i-claim ang nasabing padala at nakatakdang kasuhan ng paglabag sa Comprehensive Dangerous Drugs Act at Customs Modernization Act. - Danilo Garcia