Pulis, 3 pa inaresto sa pagnanakaw ng cable wire

MANILA, Philippines — Isang pulis at tatlo nitong kasabwat ang inaresto matapos na mahuli sa aktong nag­nanakaw ng cable wire sa Quezon City.

Kinilala ni QCPD Director, P/Bgen. Nicolas Torre III ang mga naares­tong suspek na sina Pat. Francis Baquiran, 27, nakatalaga sa Eastern Police District (EPD), residente ng Brgy. Bagbag, Novaliches, Quezon City; Ivan Fritz Valtiedaz, 26, criminology graduate, ng Brgy. Talipapa, Quezon City; Richard Repal, 32; at Needrick Suing, 25, kapwa residente ng Brgy. Tandang Sora, Quezon City.

Sa ulat bago naaresto ang mga suspek, ala-1:50 ng madaling araw kama­kalawa sa C.P. Garcia, tabi ng Baluyot Court, sa Brgy. Krus na Ligas ay nagsasagawa ang mga otoridad ng One Time Big Time (OTBT) sa lugar nang ma­aktuhan ang mga ito habang nagnanakaw ng mga cable wire ng PLDT.

Nakumpiska mula sa mga suspek ang 115 PLDT copper cable na nagkakahalaga ng P471,940; isang unit ng Taurus Banbridge GA G3c 9x19 Caliber .9MM na may serial No. ACA47683 at magazine na loaded ng pitong live ammunition; dalawang Canik magazine caliber .9mm na loaded ng siyam na ammunition; at isang Foton Wing Van na may plate number na NCX 3882.

Ang mga suspek ay nakapiit na at sasampahan­ ng kasong pagnanakaw. Sina Baquiran at Valtiedaz ay mahaharap naman sa karag­dagang kaso nang paglabag sa Republic Act 10591 o The Comprehensive Firearms and Ammunition Re­gu­lation Act.