MANILA, Philippines — Limang miyembro ng pamilya ang pinatay sa saksak ng tatlong miyembro ng ‘akyat-bahay’ na pumasok sa kanilang bahay, naganap kamakalawa ng gabi sa Brgy.Tinapian, Baleno, Masbate.
Ang mga nasawi ay kinilalang sina Adela Adique Cortes, 67; Jesus Dino Adique, 70; Jennifer Cortes Adique, 40; magkapatid na Joyce Adique Albis, 17; at Kristelle, 14. Habang nasugatan ang isang “Nika”, 13-anyos.
Agad naaresto ang isa sa tatlong suspek na itinago sa pangalang “David”, 16 na napag-alamang kaanak ng mga biktima.
Sa ulat, alas-8:15 ng gabi ay mahimbing na natutulog ang mga biktima nang pasukin ng tatlong suspek at dito ay kinuha ang cellphone nina Joyce at Kristelle, pero nagising ang huli at nakita ang ginagawang pagnanakaw ng mga suspek.
Sa takot ng suspek na sila ay makilala ay pinagsasaksak nila ang mga biktima hanggang sa mapatay habang kahit sugatan ay nakapagtago si Nika.- Doris Franche