MANILA, Philippines — Nasawi ang walong miyembro ng Dragon Boat team habang 13 ang nasagip makaraang aksidenteng lumubog ang bangkang sinasakyan nila sa karagatan ng Boracay Island, Brgy. Manoc-Manoc, Malay, Aklan kahapon ng umaga.
Kinilala ang mga nasawi na sina Mark Vincent Navarete; Omar Arcob; Maricel Tan; Yohan Tan; Richel Montoya; Antonette Supranes; John Vincent Natividad; at Von Navarosa.
Habang ang mga nasagip ay kinilalang sina Mark Baccay; Jaylord Violanda; Rober Licerio; Marc Sabado; Kenneth Bandalan; Julia Kurbaniizova; Maggie Xie; Xhen Antonia; Lani Ordas; Janice Lumbo; Jao Buenaventura; at Edwin Paradas.
Sa ulat, bago nangyari ang trahedya, alas-7:00 ng umaga ay sakay ang mga biktima na pawang miyembro ng Boracay Dragon Boat team ng kanilang bangka at naglalayag sa nasabing karagatan bilang pagsasanay sa nalalapit na international competition nang balyahin ng malalaking alon at ihip ng hangin ang kanilang bangka hanggang sa lumubog.
Ayon sa isang survivor, nasa layong 300 meters mula sa dalampasigan ng Tulubhan nang pasukin ng tubig ang kanilang 20-seater na dragon boat.
Ang ilan sa kanila ay kumapit sa lumulubog na bangka habang ang iba ay pinilit na lumangoy pabalik sa dalampasigan.
Mabilis na nagresponde sa lugar ang rescue team ng Philippine Coast Guart (PCG) at pulisya at nasagip ang 13 miyembro habang minalas namang bawian ng buhay ang 8.