MANILA, Philippines - Kapwa hindi na umabot nang buhay sa ospital ang dalawang lalaki matapos na sila ay mabangga at takbuhan umano ng isang van habang tumatawid kahapon ng madaling araw sa Roxas Boulevard, Parañaque City.
Patuloy pang inaalam ng mga otoridad ang pagkakakilanlan ng dalawang lalaking nasawi dahil sa natamong matinding pinsala sa katawan.
Hindi naman naplakahan ng isang testigo ang van na nakasagasa sa mga biktima maliban sa naiwan lamang ang bumper sa lugar ng pinangyarihan ng insidente.
Sa report, naganap ang insidente pasado alas-3:30 ng madaling araw sa northbound lane ng Roxas Blvd., Brgy. Baclaran habang tumatawid ang mga biktima at hindi nila namalayan ang mabilis na pagdating ng van kaya’t nasalpok, nasagasaan at nakaladkad ng ilang metro ang layo.
Hindi huminto ang nasabing driver ng van habang ang mga biktima ay dinala ng rescue team sa naturang ospital, subalit kapwa nasawi.