Lascañas bahagi ng demolition job – Malacañang
MANILA, Philippines - Tinawag kahapon ng Palasyo na bahagi ng ‘demolition job’ laban kay Pangulong Rodrigo Duterte ang ginawang pagkumpirma ni dating SPO3 Arthur Lascañas tungkol sa Davao death squad o DDS na sinasabing nagsa-salvage ng mga pinaghihinalaang sangkot sa ilegal na droga sa Davao City noong mayor pa sa siyudad ang Pangulo.
Ayon kay Presidential Communications Secretary Martin Andanar, ang press conference ng self-confessed hitman ay bahagi umano ng political drama na naglalayong sirain at mapatalsik sa puwesto ang Pangulo.
“The press conference of self-confessed hitman SPO3 Arthur Lascañas is part of a protracted political drama aimed to destroy the President and to topple his administration,” sabi ni Andanar.
Sinabi pa ni Andanar na ang character assassination laban sa Pangulo ay bahagi ng masamang pulitika na isinusulong ng mga sektor na tinamaan umano ng reporma na isinusulong ng Duterte administration.
Ayon pa kay Andanar, ang Pangulo ay nilinis na ng Commission on Human Rights, Office of the Ombudsman, Senate Committee on Justice tungkol sa pagkakasangkot nito sa extrajudicial killings at DDS.
Idinagdag ni Andanar na hindi madali ang pagsusulong ng pagbabago pero hindi umano magpapa-apekto ang administrasyon sa paghahatid ng serbisyo sa mga mamamayan.
- Latest