MANILA, Philippines - Nauwi sa trahedya ang masayang paliligo sa dagat ng isang estudyante matapos malunod at maging ang guro na sumagip na naganap kamakalawa sa Sitio Calabegaho, Brgy. Osmeña, Jose Panganiban, Camarines Norte.
Ang mga nasawi ay kinilalang si Gene Avellana Jr., may-asawa, guro sa Gawad Kalinga High School (GKHS) at residente ng Basud, Camarines Norte.
Habang pinaghahanap ang estudyanteng si Aaron Hitolle, 16, grade 11 ng GKHS at residente ng Purok 3 ng nasabing barangay.
Batay sa ulat, dakong alas-9:00 ng umaga ay humihingi ng saklolo si Hitolle matapos na ito ay mapadpad sa malalim na lugar kaya’t agad sumaklolo ang gurong si Avellana.
Subalit, maging siya ay tinangay ng malakas na agos ng dagat na naging dahilan upang ito ay tuluyang malunod at maging si Hitolle.
Magsasagawa ng imbestiagsyon ang DepEd-Camarines Norte sa insidente.