Drug dependent nagpakamatay sa simbahan
MANILA, Philippines – Nagkalasug-lasog ang katawan ng isang binata na kalalabas lang sa drug rehabilitation matapos itong tumalon mula sa tuktok ng simbahan kahapon ng madaling araw sa Mandaluyong City.
Ang nasawi ay kinilalang si Julius Haboc, 28, binata, barker at residente ng 646 Sitio 11, Brgy.San Jose ng lungsod.
Batay sa ulat, bago ang ginawang pagtalon ng biktima mula sa tuktok ng isang tatlong palapag na simbahan ng San Felipe Parish Church, Barangay Poblacion, dakong alas-4:20 ng madaling araw ay unang tinangka nitong tumalon sa isang konkretong poste ng Meralco sa P. Cruz St., kanto ng Boni Avenue, subalit naagapan ito ng mga miyembro ng Bantay Bayan.
Ilang minuto ay pumasok ng simbahan ang biktima na hindi pinigilan sa pag-aakala ng mga tao na nais lamang nitong magdasal.
Subalit, sa halip na magdasal ay nagtungo sa roof top ang biktima at saka tumalon.
Nabatid na ang biktima ay isang drug dependent at kalalabas lamang ng drug rehabilitation center noong nakaraang buwan.
- Latest
